Կազմակերպության անդամ երկրների ներկայացուցիչների հերթական առցանց հանդիպման նպատակն էր քննարկել նոտարի օգնականի դերին ու իրավական կարգավիճակին վերաբերող հարցեր, փոխանակվել փորձով։ Տեսակոնֆերանսի ընթացքում ուսումնասիրվել է նոտարի օգնականին իրավասության լայն շրջանակ ընձեռող միջազգային փորձը, ըստ որի՝ նոտարի բացակայության պայմաններում նրա օգնականը կարողանում է լիարժեք փոխարինել նոտարին ու կատարել նոտարական գործողություններ։ ՀՀ նոտարական պալատի նախագահն այս համատեքստում նշել է, որ ի տարբերություն այն երկրների, որտեղ նոտարի օգնականը լիարժեք փոխարինում է նոտարին՝ Հայաստանում նախաձեռնվել է օրենսդրական փոփոխություն, որի ընդունման դեպքում՝ նոտարի բացակայության պայմաններում նոտարի օգնականը կարող է փոխարինել նրան բացառապես էլեկտրոնային պայմանագրերի վավերացման դեպքում։ Լիլիթ Մուրադյանը նշել է, որ այս նախաձեռնությունը դեռ քննարկման փուլում է։ ՀՀ նոտարական պալատի՝ Նոտարական միասնական պրակտիկայի ապահովման և ուսումնամեթոդական հարցերով հանձնաժողովի անդամ Գայանե Ազարյանը ԱՊՀ երկրների իր գործընկերներին է ներկայացրել ՀՀ նոտարական պալատի փորձը՝ կազմակերպելու նոտարի օգնական և նոտարների աշխատակազմեր պատրաստող դասընթացներ։ Գայանե Ազարյանը նշել է, որ այս դասընթացների ընթացքում Հայաստանի նոտարները մասնակիցներին փոխանցում են անհրաժեշտ գիտելիքներ, ինչի շնորհիվ հենց նրանց շրջանակից կարողանում են ընտրել արհեստավարժ օգնականներ։